उपयोजित लेखन (भाग १)

दिनांक: ५ जून २०२३

प्रति,
मा. व्यवस्थापक,
हिरवाई ट्रस्ट,
बालोद्यान मार्ग, तळेगांव दाभाडे.

विषय: शाळेत वृक्षारोपण करण्यासाठी रोपांची मागणी करण्याबाबत.

महोदय,

मी अ. ब. क., 'ज्ञानदा विद्यालय, तळेगांव दाभाडे' या शाळेचा विद्यार्थी प्रतिनिधी या नात्याने हे पत्र लिहीत आहे. जागतिक पर्यावरण दिनानिमित्त आपल्या हिरवाई ट्रस्टतर्फे रोपांचे मोफत वाटप करण्यात येत आहे, हे वाचून अत्यंत आनंद झाला.

दरवर्षीप्रमाणे आमच्या शाळेतही या निमित्ताने 'वृक्षारोपण सप्ताह' आयोजित करण्यात आला आहे. त्यासाठी आम्हांला विविध प्रकारच्या ५० रोपांची (उदा. आंबा, वड, पिंपळ, कडुलिंब, आवळा) आवश्यकता आहे. तरी कृपया ही रोपे आमच्या शाळेला उपलब्ध करून द्यावीत, ही नम्र विनंती. पर्यावरण संवर्धनाच्या या उपक्रमात सहभागी होण्याची संधी आपण आम्हांला द्याल, याची खात्री आहे.

रोपे घेण्यासाठी आमचे शिक्षक आपल्या कार्यालयात योग्य वेळी उपस्थित राहतील.

आपला नम्र,
अ. ब. क.
विद्यार्थी प्रतिनिधी, ज्ञानदा विद्यालय,
तळेगांव दाभाडे.
ई-मेल: abc@gyanadavidalaya.com

दिनांक: ६ जून २०२३

प्रति,
मा. व्यवस्थापक,
हिरवाई ट्रस्ट,
बालोद्यान मार्ग, तळेगांव दाभाडे.

विषय: 'झाडे लावा... झाडे जगवा' या उत्कृष्ट उपक्रमाबद्दल अभिनंदन.

महोदय,

मी अ. ब. क., तळेगांव दाभाडे येथील एक जागरूक नागरिक व विद्यार्थी प्रतिनिधी म्हणून हे पत्र लिहीत आहे. जागतिक पर्यावरण दिनानिमित्त आपल्या हिरवाई ट्रस्टतर्फे 'झाडे लावा... झाडे जगवा' या संदेशासह रोपांचे जे मोफत वाटप करण्यात आले, त्या उपक्रमाचे मी मनःपूर्वक अभिनंदन करतो.

आजच्या काळात पर्यावरणाचा होत असलेला ऱ्हास थांबवण्यासाठी अशा उपक्रमांची नितांत आवश्यकता आहे. आपल्या संस्थेने केवळ संदेश न देता प्रत्यक्ष कृतीतून समाजासमोर एक उत्तम आदर्श ठेवला आहे. आपल्या या मोफत रोपवाटपामुळे परिसरातील अनेक नागरिकांना आणि शाळांना वृक्षारोपण करण्याची प्रेरणा मिळाली आहे.

आपल्या ट्रस्टचे हे कार्य असेच अविरत चालू राहो आणि त्यातून संपूर्ण तळेगांव परिसर हिरवागार होवो, याच सदिच्छा!

आपला नम्र,
अ. ब. क.
विद्यार्थी प्रतिनिधी,
तळेगांव दाभाडे.
ई-मेल: abc@citizenmail.com

दिनांक: २५ एप्रिल २०२३

प्रति,
श्री. विनय गायकवाड,
विनय ॲकॅडमी,
२, सोमवार पेठ, कराड.

विषय: मराठी सुलेखन वर्गात प्रवेश मिळण्याबाबत.

महोदय,

मी अ. ब. क., इयत्ता दहावीत शिकणारा विद्यार्थी असून हे पत्र प्रवेशाच्या विनंतीसाठी लिहीत आहे. नुकतीच मला आपल्या विनय ॲकॅडमीतर्फे १ मे ते ३१ मे या कालावधीत आयोजित केल्या जाणाऱ्या 'अआइई मराठी सुलेखन वर्गा'ची जाहिरात वाचनात आली.

माझे मराठी हस्ताक्षर थोडे वळणदार आणि सुवाच्य व्हावे, अशी माझी खूप दिवसांपासूनची इच्छा आहे. आपल्या मार्गदर्शनाखाली माझे अक्षर नक्कीच सुधारेल याची मला खात्री आहे. तरी कृपया मला या सुलेखन वर्गात प्रवेश द्यावा, ही नम्र विनंती.

या वर्गाची प्रवेश फी व इतर आवश्यक माहिती मला ई-मेलद्वारे किंवा पत्राने कळवल्यास मी त्वरित फी भरून माझा प्रवेश निश्चित करेन.

आपला नम्र,
अ. ब. क.
विद्यार्थी,
कराड.
ई-मेल: abc@studentmail.com

मुलांच्या आवडीनुसार शिक्षण

निसर्गातील वृक्षवेली स्वधर्माने वाढतात त्याप्रमाणे विद्यार्थ्याने वाढावे अशी गुरुदेवांची इच्छा असल्यामुळे त्यांनी प्रसिद्ध चित्रकार मुकुल डे यांना चित्रकलेकडे व नृत्यप्रेमी शांतिदेव घोष यांना संगीत कलेकडे जाण्यासाठी प्रोत्साहन दिले. व्यक्तीची आवड व योग्यता ओळखून त्याला योग्य शिक्षण दिले की त्याची मूळ बीजधर्माप्रमाणे वाढ होते. म्हणूनच गुरुदेव प्राथमिक शाळेपासूनच मुलामुलींना त्यांच्या कलानुसार शिक्षण देण्याचा आग्रह धरत असत.