४. आपण सारे एक

आपले शरीर हे एका राज्यासारखे आहे. ज्याप्रमाणे राज्याचा कारभार सुरळीत चालण्यासाठी सर्व मंत्र्यांनी आणि सेवकांनी एकजुटीने काम करणे आवश्यक असते, तसेच शरीराचेही आहे. डोळे, नाक, कान, जीभ, हात, पाय आणि पोट हे सर्व शरीराचे सेवक आहेत. कोणत्याही एका अवयवाने काम करणे थांबवले तर त्याचा परिणाम संपूर्ण शरीरावर होतो. पोटोबाने अन्न ग्रहण केले नाही, तर शरीराला जीवनरस मिळत नाही आणि सर्व अवयव गळून जातात. म्हणून, सर्वांची कामे एकमेकांवर अवलंबून आहेत व आपण सगळे शरीररूपी राज्याचे सेवक आहोत हे मेंदूराजेसाहेबांचे विधान अगदी योग्य आहे.

सर्व इंद्रियांनी पोटोबाविरुद्ध अशी तक्रार केली की, पोटोबा अजिबात काम करत नाही आणि नुसता आयते बसून खातो. डोळे, नाक, कान, जीभ, हात व पाय हे सर्व रात्रंदिवस शरीरासाठी राबराब राबतात, मात्र 'कशासाठी? पोटासाठी!' असे म्हणून सर्वजण पोटोबाचाच उदोउदो करतात. मान-सन्मान सगळा पोटोबालाच मिळतो, तो आपल्यावर सक्ती करतो आणि वेळप्रसंगी गुरगुरतो. पोटोबाच्या या वागणुकीमुळे आपली फरफट होते, या रागातूनच सर्व इंद्रियांनी पोटोबाची तक्रार मेंदूराजेंकडे केली.